Vadim Abramov: «Hammasi o‘z qo‘limizda»
O‘zbekiston kubogi 2-turi doirasida Jizzaxda o‘tgan «Dinamo» — «Nasaf» (3:3) o‘yinidan keyin samarqandliklar bosh murabbiyi Vadim Abramov matbuot anjumanida ishtirok etib, jurnalistlar savollariga javob qaytardi.
— Ha, supero‘yin muxlislarga yoqqan bo‘lsa kerak, har holda 6ta gol ko‘rishdi. Bundan xursandman. Birinchi bo‘limda yaxshi o‘ynay olmadik, bu nima bilan bog‘liq bo‘ldi, ochig‘i tushunmadim. Ikkinchi bo‘limda esa raqibning ikkinchi goli ofsayd sababli bekor qilingach, bu jamoamizni o‘zgartirdi. Shundan keyin yigitlar hujumkorlikni oshirishdi, o‘zlariga ishonch ortdi. Bugun yutishimiz ham, yutqazishimiz ham mumkin edi. Yana bir o‘yinni «Navbahor»ga qarshi o‘tkazamiz. Muhimi – hammasi o‘z qo‘limizda. Bir haftadan keyingi o‘yinga tayyorgarlik ko‘ramiz. Bugungi ajoyib, ochiq hujumkor o‘yin uchun «Nasaf»ga ham minnatdorchilik bildiramiz.
90+10-daqiqadagi Yorbekovning zarbasi? Biz ko‘rgan o‘rtadagi kameradan goldek ko‘rindi, ichkarida ko‘rganimizda gol emasdek. Bugun ba’zi vaziyatlarda bizga, ba’zida raqibga omad kulib boqdi.
— Demak, jamoangiz 2 ochko yo‘qotdi yoki bir ochkoni qo‘lga kiritdimi?
— Bilmadim, asosiysi keyingi tur oldidan barchasi o‘z qo‘limizda. Bizda ham, «Nasaf» va «Andijon»da ham 2-o‘rin uchun imkoniyat bor. «Navbahor» esa 1-o‘rinni kafolatladi.
— «Nasaf» kubokning amaldagi sohibi va bu jamoaga 3ta gol urish yaxshi natija. Ammo bugun 3ta, Superliga peshqadami «Andijon»ga ham 2ta gol urib, so‘nggi daqiqalarda g‘alaba qo‘ldan chiqarilgandi. Jamoa himoyalanishda qanday muammoga ega?
— Ha, shunday muammo bor, buni bilaman, ammo buni bu yerda muhokama qilishim to‘g‘ri emas. Buni jamoam bilan gaplashib, xatolar ustida ishlaymiz. Ha, «Real» — «Manchester Siti» o‘yinida ham Madrid yaxshi himoyalangan bo‘lsa-da, 3:3 bo‘lgandi. Biz o‘tgan ikki o‘yinda ham yetakchilarga qarshi o‘ynadik, andijonliklar ham Superliga peshqadami. Har o‘yinimiz deyarli safarda o‘tyapti.
Darvozabonlar masalasi? Darvozabonimiz yosh, mengacha Superligada deyarli o‘ynamagandi, sekin-asta o‘ziga ishonchi ortmoqda. U bugun bir necha qiyin vaziyatlarda jamoani qutqardi, ba’zi vaziyatlarda yaxshiroq o‘ynashi mumkin edi. Bu futbol.
— Kojoning zaxiraga olingani nima bilan bog‘liq?
— U jarohat oldi va o‘zi zaxiraga olishni so‘radi. Shu bois uni maydondan oldim.
— Odatda muxlislarni uncha eshitmaysiz, bugun esa muxlislar «Yagr, Yagr» deya hayqirgach, uni maydonga tushirdingiz. Va u maydonda yaxshi o‘ynadi...
— Yo‘g‘e, men Yagrni muxlislar so‘ragani uchun emas, yordami kerakligi uchun tushirdim. Axir, uni muxlislar hayqirig‘i uchun olib kelganimiz yo‘q. U jarohatidan to‘liq tiklanmagandi, shu bois so‘nggi daqiqalarda tushdi. Uning potensiali yaxshi. U hali jamoamizni yanada kuchaytiradi.
— So‘nggi tur oldidan imkoniyatlar qanday?
— Imkoniyat bor. «Navbahor» vazifasini uddaladi, bizga qarshi qanday tarkibda kelishini bilmaymiz. Har qanday holatda ham biz g‘alaba uchun tayyorgarlik ko‘ramiz. 2-o‘rinni olib, guruhdan chiqish kerak.
— Jamoaning mashg‘ulotlar maydoni yomon ahvolda ekanini ko‘rdik...
— Siz ko‘rgan maydon biz mashg‘ulot o‘tkazgan eng yomoni emas hali... Afsuski, Samarqandda mashg‘ulotlar uchun yaxshi maydon yo‘q. Bu muammo bor va umid qilamanki, buni hal qilishadi. Stadionimizning yangi maydoni deyarli tayyor, ammo bu maydonni hozirgi holatda ushlab turishning o‘zi ham katta xarajatni talab etadi. Bu masalalar tezroq hal bo‘lishiga umid qilamiz, — deydi Vadim Karlenovich o‘yindan keyin.
«Dinamo» matbuot xizmati.
Manba: fcdinamo.uz
