Ro‘ziqul Berdiyev: «Chuqur himoyalanadigan jamoalarga qarshi o‘ynashda qiynalyapmiz»
Coca Cola Superligasining 5-turidan o‘rin olgan “Mash’al” – “Nasaf” (0:0) uchrashuvidan keyin mehmonlar bosh murabbiyi Ro‘ziqul Berdiyev o‘z fikrlarini bildirdi.
— O‘yin og‘ir kechdi, chuqur himoyalanadigan jamoalarga qarshi o‘ynashda qiynalyapmiz, mana ikkinchi o‘yinda ham shuday bo‘ldi. Hujum chizig‘imiz juda faol o‘yanashi kerak, lekin ular bugun maydonda ko‘rinmadi. Bugun 4 hujumchimiz o‘ynagan bo‘lsa, birortasi raqib darvozasiga zarba bermadi, bunday o‘yin bilan albatta, g‘alaba qozonish qiyin. Bundan tashqari, "Mash’al" besh himoyachi bilan o‘ynagan holda yaxshi himoyalandi. Ko‘p imkoniyat yaratishga bizga imkon bermadi, ular qarshi hujumlarga ham o‘tib turdi.
— Karantin hamma jamoaga salbiy ta’sir qildi. Murabbiy sifatida bunga qanday rejalarni tuzgansiz?
— 3 oylik tanaffus — bu juda ham katta tanaffus. Albatta, individual mashg‘ulotlar bilan futbolchilarning potensialini namoyish etish qiyin. Hozir hamma jamoaning oldida bitta yo‘l bor - o‘yin orqali jismoniy tayyorgarlikni yo‘lga qo‘yish yoki jamoaviy o‘yinini joriy qilish. Ko‘p futbolchilar o‘z darajasini ko‘rsata olishmayapti. Mana ikkinchi o‘yindirki, Kenjaboyev yoki Bozorov o‘z darajasida o‘ynay olishmayapti.
— O‘tgan turda Umar Eshmurodov "Nasaf" sardori edi, bugun esa sardorlik bog‘ichi Dilshod Rahmatullayevga topshirildi. O‘zgartirish penaltini aniq amalga oshira olmagani bilan bog‘liqmi yoki boshqa sabab bormi?
— Agar mavsum boshida e’tibor bergan bo‘lsangiz, bizning sardorimiz — Dilshod Rahmatullayev. Unga sardorlikni berganimiz sababi, jamoamizdagi eng tajribali va yoshi katta futbolchilarimizdan biri sanaladi. O‘tgan gal Dilshod Rahmatullayevning jarohati borligi sababli Umar Eshmurodov sardor sifatida jamoani maydonga boshlab chiqqandi.
— Maydonning holati haqida nima deya olasiz?
— Bizga maydon bilan bog‘liq holat ma’lum edi, shu boisdan kecha bu yerga kelib mashg‘ulot o‘tkazdik. Muborakda har doim yaxshi maydon bo‘lardi, hozirgi holati esa yaxshi emas. Buni mezbon jamoa vakillari ham biladi. Maysaning balandligi va maydon notekisligi, balki o‘yinlar mazmunli o‘tishiga ta’sir ko‘rsatayotgandir. Muborakdagi maydon talab darajasida emas, bunga mana bugun guvoh bo‘ldik.
— Doniyor Narzullayevning natijalari yaxshi, mana bugun ham yaxshi o‘ynadi. Uni ortga qaytarish rejangizda bormi?
— Albatta, o‘sishda davom etsa, bundan xursandmiz. Lekin uning ketishi o‘z xohishiga ko‘ra bo‘lgandi. O‘zi mening oldimga kelib, shuni so‘ragandi. Uning oldida "Bunyodkor" va "Metallurg"dan taklif bor edi, u "Metallurg"ni tanladi. Uning hozirgi o‘yinlaridan xursandmiz, balki o‘sishda davom etaversa, yana ortga qaytararmiz.
— "Mash’al" va "Navbahor" bilan o‘yin durang bilan tugadi. Jamoalar o‘rtasidagi tafovut haqida aytib o‘tsangiz.
— Har ikkala jamoa bizga qarshi himoyaviy o‘yin ko‘rsatdi, lekin "Navbahor"ning saviyasi va darajasi "Mash’al"nikidan yuqoriroq. Lekin men "Navbahor"dan bunchalik himoyaviy o‘yinni kutmagandim. "Mash’al”ning o‘tgan o‘yinlarini ko‘rib chiqqandik, jamoa juda tartibli o‘ynaydi, ammo hech bir o‘yinda 5 himoyachi bilan o‘ynamagandi. Bugun himoyaviy tarzda va qarshi hujumda o‘ynadi.
Manba: fcnasaf.uz
